2012  දකුණු ආසියානු ජංගම දුරකථන සමුළුව මෙම මැයි 30 දා ශ්‍රී ලංකාවේදී  පැවැත්වේ.

ශ්‍රී ලංකා තොරතුරු හා සන්නිවේදන තාක්‍ෂණ නියෝජිතායතනය විසින් ‍මෙම සමුළුව සංවිධානය කරනු ලබයි.

  ජංගම දුරකථන ක්ෂේත්‍රය සම්බන්ධයෙන් ජාත්‍යන්තර මට්ටමේ කිර්තියට පත් විශේෂඥයින් මෙන්ම වෘත්තීය වේදීන් රැසක් මෙම සමුළුව ඇමතීමට නියමිතය.

 ජනතාවගේ දෛනික කටයුතු පහසුකර ගැනීම සදහා ජංගම දුරකථනය යොදා  ගත හැකි ආකාරය පිලිබදව කලාපයේ සෙසු රටවල් සමග මෙම  සමුළුවේදී පුළුල් කතිකාවක් සිදු කෙරෙන බව ශ්‍රි ලංකා තොරතුරු හා සන්නිවේදන තාක්‍ෂණ නියෝජිතායතනය පවසයි.

 තොරතුරු හා සන්නිවේදන තාක්‍ෂණ ක්ෂේත්‍රය ඉතා වේගයෙන් ජනතාවට සමීප වෙමින් පවතින යුගයක එහි ප්‍රතිලාබ ජනතාවට ලබාදීම සදහා ජංගම දුරකථනය මෙවලමක් වශයෙන් යොදා ගැනීමට  හැකි නව ප්‍රවනතාවයන් ගැන විමසා බැලීමට මෙම සමුළුව ඉතා වැදගත් වන බව  නියෝජිතායතනයේ ප්‍රධාන විධායක නිලධාරී රෙෂාන් දේවපුර මහතා සදහන් කරයි.

  ලොව ප්‍රකට ජංගම දුරකථන සන්නිවේදන විශේෂඥයකු වන රැල්ෆ් සයිමන් මෙම සමුළුවේ විශේෂ දේශනයක් කිරීමට නියමිතය.බටහිර ජනප්‍රිය ගායිකාවන් වන මැඩෝනා සහ ලේඩි ගගාගේ මාධ්‍ය උපදේශකයෙකු වන රැල්ෆ් සයිමන් යුටු සංගීත කණ්ඩායමේ ප්‍රචාරක කටයුතු බාරව ද ක්‍රියා කරයි.

 මීට අමතරව ජංගම දුරකථන ක්ෂේත්‍රයේ  ප්‍රධාන පෙළේ දේශකයෙකු  වන  ටොමී අහුනෙන්ද මෙම සමුළුවේ තවත් දේශනයක් පැවැත්වීමට නියමිතය.

 කොළඹ සිනමන් ග්‍රැන්ඩ් හෝටලයේදී 30 වනදා පෙරවරුවේදී සමුළුව ආරම්භ කෙරෙන අතර ශ්‍රී ලංකාවේදී සමුළුව පැවැත්වෙන තෙවන අවස්ථාව මෙය වේ.

 සමුළුව සදහා මුලෝපායික දායකත්වය සපයන්නේ  එටිසලාට් සමාගමයි.   

පරිගණකය සහ අන්තර්ජාලය සමග සිංහල සහ දෙමළ භාෂාවන්ගෙන් වැඩ කිරීම පහසු කිරීම සදහා සකස් කරන ලද මෘදුකාංග සහ අන්තර්ගතයන් රැසක් එලිදැක්වීම පසුගියදා කොළඹ  ජයික් හිල්ටන් හෝටලයේ දී සිදුවිය.

 ශ්‍රී ලංකා තොරතුරු හා සන්නිවේදන තාක්‍ෂණ නියෝජිතායනයේ  මුලිකත්වයෙන් මෙම  මෘදුකාංග සහ අන්තර්ගතයන් සකස් කර තිබේ.

සිංහල භාෂා සංඛ්‍යාංක යුනිකෝඩ්  ප්‍රමිතියට සකස් කර එළි දැක්වීම මෙහිදී සිදු කරන ලද අතර  1134: 2011 ශ්‍රී ලංකා ප්‍රමිතියට අනුකූලව මෙය සකස් කර තිබේ.

   ශෛයිලිගත කලාත්මක ආකාරයෙන් සකස් කරන ලද සිංහල  ෆොන්ට හයක් සහ දෙමළ ‍‍ෆොන්ට හයක් එළිදැක්වීමද මෙහිදී සිදු විය.

 පරිගණකය ආශ්‍රිතව ලිපි ලේඛන සකස් කිරීම මෙන්ම වෙබ් අඩවි නිර්මාණය කිරීමේදී එම කටයුතු ඉතා කලාත්මක සහ නිර්මාණශිලි  ලෙස කිරීමට හැකි ආකාරයෙන් මෙම ‍ෆොන්ට සකස් කර තිබේ. 

  යුනිකෝඩ් ෆොන්ට නිර්මාණය කිරීමේ පුහුණු වැඩසටහන යටතේ පුහුණුව ලැබු ශීෂ්‍යයන් විසින් මෙම ෆොන්ට  නිර්මාණය කර තිබෙන අතර  එම ශිෂ්‍යයින් ඇගයීමට ලක් කරමින් සහතිකපත් ප්‍රදානය කිරීමද  මෙහිදී සිදු විය.

  ඇපල්මැක් මෙහෙයුම් පද්ධතිය සිංහල හා දෙමළ භාෂාවන්ගෙන් භාවිතා කිරීමට සකස් කරන ලද යතුරු පුවරු ධාවකය හා එම  ෆොන්ට එළිදැක්වීමද  මෙහිදී සිදු සිදු විය.

 සිංහල හා දෙමළ ෆොන්ට සකස්  කිරීම පිළිබදව සම්පාදනය කරන ලද (Guide to creating Sinhala and Tamil Unicode Fonts) ග්‍රන්තය දොරට වැඩුමද  දේශීය භාෂා ක්‍රියාකාරී කණ්ඩායමේ සමාජිකයින් ඇගයීමට ලක් කිරීමද මෙහිදී සිදු විය.

   ඉතා විචිත්‍ර භාෂාවක් වු සිංහල  භාෂාව තොරතුරු හා සන්නිවේදන තාක්‍ෂණය නිසා තව තවත් ඔප නැංවුණු බව   මෙම උත්සවය ඇමතූ මහාචාර්ය ජේ.බී.දිසානායක මහතා පැවසීය.

 තොරතුරු හා සන්නිවේදන තාක්‍ෂණ අමාත්‍යංශයේ ලේකම් නිමල් අතුකෝරළ ශ්‍රී ලංකා තොරතුරු හා සන්නිවේදන තාක්‍ෂණ නියෝජිතායතනයේ සභාපති මහාචාර්ය පී.ඩබ්ලිව්.ඈපාසිංහ ප්‍රධාන විධායක නිලධාරී රෙෂාන් දේවපුර මහත්වරු අතින් සම්මාන සහ සහතික පත් ප්‍රදානය සිදු විය.