2013 ජගත් තොරතුරු තාක්‍ෂණ සුදානම්  දර්ශකයට (Global Networks Readiness Index)   අනුව ශ්‍රි ලංකාව පසුගිය 2012 වසරට වඩා මෙම වර්ෂයේදී  ස්ථාන දෙකක් ඉදිරියට ඒමට සමත් වී තිබේ. 

ජගත් ආර්ථික සංසදය විසින් ස්වාධීන නිරීක්‍ෂණ හා සමීක්‍ෂණ මත පදනම් කර ගනිමින් වාර්ෂිකව මෙම වාර්ථාව නිකුත් කෙරෙන අතර මෙවර මෙම වාර්ථාව සකස් කිරීම සදහා රටවල් 144 ක් සමීක්ෂණයට ලක්කර තිබෙන අතර එම සමස්ත රටවල් අතර ශ්‍රී ලංකාවට 69 වන ස්ථානය හිමිවී ඇත. 

පසුගිය 2012 වසරේදී ශ්‍රී ලංකාවට හිමිවී තිබුණේ 71 වන ස්ථානයයි. 

දකුණු ආසියා කලාපයේ රටවල් අතරින් දෙවන ස්ථානයට පත්වීමට  ද ශ්‍රී ලංකාව සමත් වී තිබෙන අතර එම ප්‍රථම ස්ථානය ඉන්දියාව විසින්  හිමිකර ගෙන තිබේ. 

මීට අදාළ කර ගත් රටවල තොරතුරු තාක්‍ෂණ පරිසරය, තොරතුරු තාක්‍ෂණ භාවිතය සදහා සුදානම, තොරතුරු තාක්‍ෂණය ථලදායී ලෙස භාවිතය , තොරතුරු තාක්‍ෂණය ආර්ථිකයට සහ සමාජයට සිදු කරන බලපෑම යන ප්‍රධාන නිර්නායකයන් මත මෙම දර්ශකය සකස් කෙරේ. 

තොරතුරු හා සන්නිවේදන තාක්‍ෂණය මේ වන විට මෙරට සංවර්ධනයේ ප්‍රධාන සාධකයක් බවට පත්වී තිබෙන බව ශ්‍රී ලංකා තොරතුරු හා සන්නිවේදන තාක්ෂාණ නියෝජිතායතනයේ (ICTA) ප්‍රධාන විධායක නිලධාරී රෙෂාන් දේවපුර මහතා පැවසීය.

ජාත්‍යන්තර අයිබීඑම් ආයතනය මෙවර ශ්‍රී ලංකාවේදී පවත්වන ලද “අයිබීඑම් මෘදුකාංග විශ්වය 2013” සමුලුවේ ප්‍රධාන ආරාධිතයා වශයෙන් සහභාගිවෙමින් දේවපුර මහතා මෙම අදහස් පළ කළේය. කොළඹ  සිනමන් ග්‍රැන්ඩ් හෝටලයේදී මෙම සමුලුව පැවැත්විණි.

“තොරතුරු හා සන්නිවේදන තාක්‍ෂණය අද වන විට ජනජීවිත වලට ඉතා සමීප වී තිබෙනවා සේම රටේ සංවර්ධනය සදහාද එය යොද ගනිමින් සිටිනවා.විශේෂයෙන්ම යුද්ධය නිමා වී  රටට සාමය උදාවීමත් සමගම ජනාධිපති මහින්ද රාජපක්‍ෂ මැතිතුමාගේ අපේක්‍ෂාවක් වන දැනුමේ කේන්ද්‍රස්ථානය බවට ශ්‍රී ලංකාව පත් කිරීමේදී ජනතාව රාජ්‍ය  අංශය මෙන්ම රටේ   රැකියා උත්පාදනය සදහා නව මානයන් සොයා යාතුව තිබෙනවා.එහිදීත් ඉතා වැදගත්ම මෙන්ම පළදායීම සාධකය වන්නේ තොරතුරු හා සන්නිවේදන තාක්‍ෂණයයි. මෘදුකාංග නිර්මාණ ක්ෂේත්‍රයේද ශ්‍රී ලංකාව  අද දස්කම් දක්වමින් සිටිනවා” යැයිද දේවපුර මහතා මෙහිදී සදහන් කළේය.