සරසවියෙන් නවක වදය තුරන් කිරිමට ඇප් එකක්
නවක වධයට ගොදුරුවන විශ්ව විද්‍යාල ශිෂ්‍ය ප්‍රජාවට ඒ බව පැමිණිලි කිරීම සදහා යොදා ගැනීමට හැකි ජංගම දුරකථන යෙදවුමක් (EMERGENCY SAFTY MOBILE APP) හදුන්වාදීමට පියවර ගැනේ.
ශ්‍රී ලංකා තොරතුරුහා සන්නිවේදන තාක්ෂණ නියෝජිතායතනය හා (ICTA) විශ්ව විද්‍යාල ප්‍රතිපාදන කොමිෂන් සභාව(UCG) ඒකාබද්ධව මෙම ජංගම දුරකථන යෙදවුම හදුන්වා දී තිබේ.
ගූගල් ප්ලේ ස්ටෝර් (Google Play store) සහ ඇපල් ස්ටෝර්(Apple Store) හරහා මෙම ජංගම දුරකථන ඇප් එක තම ස්මාට් ජංගම දුරකථනයේ ඩවුන්ලෝඩ් කර ගත හැක.
ඒ අනුව විශ්ව විද්‍යාල ශිෂ්‍ය ශිෂ්‍යාවක් නවක වධයකට හෝ වෙනත් හිංසා පීඩාවකට ලක්වුවහොත් මෙම ජංගම දුරකථන යෙදවුම හරහා අදාළ අංශය වෙත පැමිණිලි කිරීමට හැකිවේ.
විශ්වවිද්‍යාල තුළ ගොඩනැගී තිබෙන වාතාවරණයන් තුළ නවක වද හෝ ඒ ආකාරයේ සිදුවීම් පිළිබද පැමිණිලි ලැබීම දුර්වල මට්ටමක පවතින බව අනාවරණය වී තිබෙන අතර මෙම තාක්ෂණික ක්‍රම වේදය නිසා ඊට පිළියම් ලැබෙනු ඇතැයි ද අපේක්ෂා කෙ‍රේ.
තවද විශ්වවිද්‍යාල බලධාරීන්ට අධ්‍යයන හා අනධ්‍යයන කාර්ය මණ්ඩලයටද මෙම ජංගම දුරකථන යෙදවුම හරහා අදාළ අංශය වෙත තොරතුරු ලබා දීමට හැකිවීම විශේෂත්වයකි.
මෙම ජංගම දුරකථන යෙදවුම හදුන්වාදීම උසස් අධ්‍යාපන අමාත්‍ය විජේදාස රාජපක්ෂ මහතාගේ ප්‍රධානත්වයෙන් විශ්ව විද්‍යාල ප්‍රතිපාදන කොමිෂන් සභාවේදී පැවති අතර එහිදී අදහස් දැක්වු අමාත්‍යවරයා : මේ වන විට විශ්වවිද්‍යාල තුළ සිදුවන නවක වධය ඉතා අමානුෂික මුහුණුවරක් ගෙන තිබෙනවා.එය ජාතික උවදුරක් බව කීවොත් නිවැරදියි.විශ්වවිද්‍යාල පරිපාලනයටත් එය තර්ජනයක්.මෙවැනි වාතාවරණයක් යටතේ නවීන තාක්ෂණය යොදා ගෙන මෙම තත්වය මැඩලීමට කටයුතු කිරීම ඉතා වැදගත්.මේ සම්බන්ධයෙන් කටයුතු කල අයිසීටීඒ ආයතනයට අපේ ස්තුතිය හිමිවිය යුතුයි.
උසස් අධ්‍යාපන රාජ්‍ය අමාත්‍ය මොහාන් ලාල් ග්‍රේරෝ ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනයේ ප්‍රධාන විධායක නිලධාරී දමිත් හෙට්ටිහේවා,විශ්වවිද්‍යාල ප්‍රතිපාදන කොමිෂන් සභාවේ සභාපති මහාචාර්ය මොහාන් ද සිල්වා,කොමිෂන් සභාවේ අධ්‍යක්ෂ උමා කුමාරස්වාමි යන මහත්ම මහත්මීන් ඇතුළු පිරිසක් මෙම අවස්ථාවට සහභාගි විය.
